ARMY HOME: April 2009

Army nu, ngilnei leh zaidam, tanpui ngaite tanpuina kawnga chhuanlam siam ve ngai lo, a kut renchhamte thleng phaka phar thin hriatrengna lung chu phun a ni ta (3.4.2009). Mite ngainat hlawh, khawngaihna leh ngilneihnaa khat nu, Pi Lalchhuangi w/o Pu Thangchina, Sihfa hi kei takngial pawh hian ka hre reng ang. Officer atan commission kan nih hlimin, an khaw kaltlang ngai Phuaibuang Corps-ah dah kan ni a. Officer junior leh zakzum tak kha headquarters kal dawnin emaw, haw dawnin emaw mi ina riah a, chaw lam a ngai thin a, kea nihnih kal a nih avangin.

A chang chuan Keifang atang te, Saitual atangtein zing takah, khaw la var hmain ka tho va. Mahni bag akin, Phuaibuang ban hman ngei tumin kein ka chhuak thin a. Chuti ang hunah chuan Pi Lalchhuangi hi ka tan malsawmna a ni thin.

"Chaw in chhum apiangin mikhual pahnihkhat tal thlak kep ziah rawh u" tih chu nu leh pate thupek a nih avangin, an ina tukthuan lam chhoh pawh min tingam sawt a. Puar el euha kan ei bakah chhuna ei tur min la funsak ziah lehnghal. AW! Kha In, a neitupain 'Kan Chhungkaw Entu' tia a sawi thin, nu ngilnei tak awmna kha, 5 star hotel ai pawhin ka tan chuan a thlakhlelhawm a, ka thla a muang thin.

Kha In, liang hniam ang reng tak, a neitupa erawh pa sang tak ni si, a bang thumbawh-kaihsawih, a kanga sak kha ka mitthlaah a cham reng thin. A kawtah buhherkhawl a awm a, favai awm hner-hnur te, ar tla noh nohte pawh kha ka la mitthla thiam khawp mai.

Pi Lalchhuangi thlan
Mahni awmna pana kea ka kal chu an inah tukthuan ei hma deuhvin ka lut hlawl a. Chaw ka rawn ei dawn tih bak chu ti-ti khawchang han sawi tur pawh ka la hre em em lo va. Ani erawh chuan ka awmna te min zawt a. Ka chan chanchin te leh rawngbawlna chanchinte min zawtin min be tlangnel zung zung thin. Zahzum nak alaiin ka han tawngtlem zui a, mi lo thlengtute tan kha chuan ka buaithlak ve ngawt thin ta ve ang.

Sihfa khua
Phuaibuang khua hi luipui pahnihin a dan, Tuivai kuala awm a ni a. Saitual lam leh Darlawn lam atangin ka kal ber thin a, 'W' anga kea nihnih kal a ni a. Chawhma chhuk, chawhnu chho a ni ber e. Mahse, chak vanglai deuh a ni bawk a, nikhat kalah ka hmang thin. Amah ka hriatna leh kan Phuaibuang awm hi a inzawm tlat avangin, Phuaibuang khaw kalkawng nen ka han ziahpawlh mai a ni e.

Lungphun ni hian Pi Lalchhuangi chanchin ziahna 'Kan Chhungkaw Entu' tih lehkhabu tihchhuah a ni bawk. Pi Lalchhuangi hi Commissioner Lalhlimpuii nu a ni e.