Pawl thum ka pass kum chuan, kan Officer Captain Thazova chuan Corps Cadet-ah i tang ve thei angem tiin min rawn bia a. Phur takin Form ka chhang ve nghal a. Corps Cadet ka ni ve ta. Inkhawma chang sawi te, Khuang vuak te, Dar vuakte, leh thil tih kan neih reng rengin mark a put vek avangin zak deuh chung pawhin eng emaw tal kan ti ve hram hram thin a. Khang kha rawngbawlna kawnga inzirna tha tak an lo ni. Lower Grade ka zova, ka tawpsan ta mai a. Mahse chuti chung pawh chuan kum thum chhunga kan zir leh activity te khan ka nun an hneh thui hle a ni.
Thlalakah hian Lower Grade leh Higher grade kan in kawp a. Kan CO leh mi dang pahnih Ropuina ramah an kal tawh a. Officer pahnih kan awm a. Hmeichhe pathum te hi an pasalte avangin pawl dangah an awm a. CSM pahnih an awm a, a dangte pawh hi pakhat tih chauh loh chu Local Officer an ni vek. Kan Corps Cadet session kha a hlawhtling hle a ni. Kan C O Captain Thazova te, kan Guardian Lalnghaka (kawmthlang Nghaka kan tih mai) Major Thantluangi ute kha an fakawm hle mai. Lalpa chu fakin awm rawh se.
Lalkiamlova
Commissioner
