field session 2010

The Salvation Army, India Eastern Territory Field Session chu ni 14-16 October 2010 khan tluang tak leh hlim taka hman zawh a ni ta. Booth Conference Hall-ah he Field Session hi hman tura ruahman a ni a. 2007 kum pawhin Colonel D Jayapaul TC hovin he hall-ah hian kan lo hmang tawh a, kan leng a.

Ni 14 zana welcome meeting kan han nei chu kan tawt ta hle mai a. Retired Officer-hovin a tuk atangin min la belh dawn leh nghal a. Inkhawm ban rual rual chuan Temple-a insawn kan rel ta a. Temple Corps CO biak a ni a, rem a lo ti a, a tuk atangin kan insawn ta a ni. Co erawh a khawngaihthlak deuh, zing tawngtai inkhawm banah upa pakhat chuan engatinge ka thu lova biak in i hmantir tiin a kamkhat a ni awm e.

Tuntum field session chu business lam ni lovin spiritual lama hman a ni. Zai a nuam a, kan tui a, lam an awm reng bawk. Contemporary song kan sa hnem deuh ber. Kan programme atang hian hun kan hmandan chu a hriattheih ang.

Colonel Sawichhunga TC hun laiin field session-ah evan. Vanlalnghaka sawm a ni tawh a, chu chu territory-a a vawikhatna a ni a. Tunah hian Salvationist layman pahnih sawm an ni leh a, hei pawh hi territory-a a vawikhatna a ni bawk. Pu PL Thanga hian puithiamte awmdan tur bakah international salvationism lam a sawi a, Nl Nuhliri hian kan mite min beisei dan a sawi ber a, chung zingah chuan 'mitthi vuinaah te, inneihnaahte hian kan thusawi ngaithla tura lo kal an ni lo va, mitthi avang leh inneite avanga lo kal an ni a, thuchah tawikim tha tak sawi thin rawh u' a ti.

India Eastern Territory-a a vawikhatna atan Colonel Samuel Charan, Territorial Commander chuan Auxiliary Captain 15 hnenah Certificate of Warranty hlan a ni.

fela

BOOK REVIEW - PRIMORDIAL WOMEN-LESSONS FOR TODAY

Name of Book: Hmasang Hmeichhiate - Thangtharte Zirlai (Primordial Women-Lessons for Today)
Ziaktu : Colonel Lalzamlova
Publisher : The Salvation Army, India Eastern Territory
Printer : Centenary Press
Copy : 1000
Page : 69
Cover : Art paper multi-color
Aman :Rs. 15

He lehkhabu hi a ziaktu tunu hmasa ber (Ruth Vanlalremruatfeli) puala a ziah a ni a. A tunu thlalak chu a kawmah a tarlang nghe nghe. Bible-a hmeichhe hmasa 22 la chhuakin, an hming awmzia te, an nungchang tlangpui te leh an nihnate a tarlang a. Chung mite atang chuan tunlai thangtharten engnge zir tur an neih a tarlang bawk.

Bible-a mite chauh hmang lovin a ziaktu hian ama chanchin atang pawhin zirlai a siam bawk. He lehkhabu atang hian an tu hmuh hmasak ber an hmangaihzia kan hre thei a. Amah awm pha lo leh paw pha lova an awm avanga an ngaihzia te, an thlakhlelhzia te kan hmu thei bawk.

He lehkhabu hi hmeichhe naupang leh tleirawl chhiar atan a tha bik hle. Chutih laiin mipa tan pawh thil tangkai tak a awm bawk. Chhungkaw inrelbawl that pawimawhnate kan hmu thei. A ziaktu hian an chhungkaw chanchin thui deuh tak atangin a tarlang bawk.

Chuta thinlung khawi thei tak chu a pi tawngtai thin thu hi a ni. A tupa leng a haw hma loh chuan tawngtai chungin a lo nghak thin a, chumiin rah tha a chhuah tak dante hian a chhiartute chu a khawih ngeiin a rinawm.

A chhungthu tifiah turin Mizo thawnthu thenkhat a hmang bawk a, hengte pawh hi tunlai atan chuan naupangte hnena Mizo thawnthu inhrilh chhawnna hmanraw tangkai tak a ni bawk.

Naupangten an chhiar a, an ngaihtlak pawha a lem an hmuh tur milem thenkhat dah a ni bawk. Hengte hian naupangte chu hrefiah turin a pui ngei bawk ang.

fela