NEPAL LAMAH THUNG AW

(Khatmandu-a Salvation Army Fellowship Memberte)

India Eastern sipaiten Nepal ramah chanchin tha thlen tura kan vei tanna hi a rei ta viau mai. Kum 20 lai kal taah khan Outreach Evangelism Secretary ka nih laiin Nepali mi N E Bualpuia piangthar Salvation Army zawmtute hruaiin ka zuk tlawh a. Kan luh hmain Siliguri-ah ro kan rel a, kan thutihthluk dan chuan Ka thiante pathum chuan anmahni khua theuh an tlawh anga, rawgbawlna tan theih a nih dawn leh dawn loh an thlithlai ang a. Kei erawh chu Khatmanduah ka tlang anga. Hapta khat hnuah Siliguri-ah bawk inhmukhawm lehin report kan inpe tawn ang, kan ti a. kan tum ang theuhvin tluang takin kan kal a. Ka thiante report pawh a ngaihnawm hlawm khawp mai a. Beiseina sang tak kan nei. Kei erawhchu ka beidawn ang reng hle mai a. Kalimpong mitdel Schoola kan thawh laia kan thawhpui Tawngtheilo School lama thawk Mr. Solona, Nepala Every Home Crusade-a thawk chu ka va zawng chhuak a. A inah min hruai a, 'kan office lawk ange aw' a ti a. A carpet a hlim a, a chhuata bungraw thuhrukna a lo neih chu a zuk hawng a. Type writer leh office bungraw dangte a phawrh chhuak a. An type zung zunga a zawh veleh a dah leh a. Carpet a phah hnan leh thlap a. Christiante chu chutiang tak chuan an lo chep a lo ni a. A bungrua Office lam thil engmah police in an hmu tur a ni lo. A hna te a tih zawh hnu chuan kan chhuak a, kawngka kan pel fel chauh tihin a mite zinga mi pakhat thingtlang lam atangin a lo kal a, 'ka thiante pahnih an man a, tunah hian thana an panpui mek' a rawn ti a.

Heng hi ka vawikhat zu kalnaa ka experience a ni a. A tih dan tur ka van hle mai a. Pathian hnenah ka tawngtaia, ka rilrua lo lang taber chu an lal chhungkaw thlalak leia tawngtaisak a ni a. Tichuan Market atangin Lal chhungkaw thlalak ka lei a. Chutih lai chuan Aizawlah Nauhnuchham In hlui, tuna Staff Quarters building din taknaah khian kan awm a. Kan sitting roomah Nepal Lal chhungkaw thlalak chu tarin nitin kan chhung Inkhawm apiangin Nepal ram tan kan tawngtai ta a. Kum khat kan tawngtai hnu chuan Nepal ram chu 'Democracy a ni dawn ta' tih TV in a rawn puan zan kha ka mitthlaah a la chiang hle mai. Pathian hnenah lawmthu kan sawi a.

Hman kum deuh khan Commissioner Lalthanngura te pawhin TC an nih laiin an zuk tlawh bawk a. Tunhnai deuhvah Captain Richarda te nupa a ram thlithlai turin Appointment pek an ni a. Richarda te awm laia ka han tlawh leh chu thil a lo danglam ta hle mai a. Beiseina thar kan neih belh zel a. Nikum 2008-ah kan han tlawh leh phei chuan Inkhawmnate kan nei ta hial a, ava ropui em.

(Above: Kan nu dinglam a mi lehka hmaa mi hi nupa an ni a. Fellowship

enkawltute an ni)

(Right: First Floor hi Khatmandu a Army-in Inkhawmna atana an luahlai a ni.)
Kan Generalin Nepal ram chu Salvation Army din a remtiin a thawktu atan Major Lalsangliana te nupa tuna Darjilinga thawk mekte chu a pawm fel ta. Ni 15 April 2009 ah an hna hi zawm tura tih an ni. Lalpan a hmana Army nghet taka an phuna a, thlaraubo tam tak man an nih theih nan leh tanpui ngai tam takten Krista malsawmna tisa leh thlarauah an dawn nan i tawngtaisak ang u.

Lalpan kan mamawh min pe zelte hi ava lawmawm em. A hnuaia thlalak tlar hmasa veilam a mite nupa hi Keshav a te nupa an ni a. Keshav a hi a nu Kalimpong Mitdel School-a matron thin a ni a. Amah hi Company director a ni a. A nupui hi Nurse a ni a, Behala Salvation Army girls Home chhuak a niin Punjaba Salvation Army Hospitala Nurse zirzo a ni a. Tunah hian International Schoolah Nursein a thawk mek a ni a. Tlar hnunga a li tak a mi hi an fapa naupang zawk a ni a. Zirlai a ni a. A u in chinaah Medical lam a zir mek bawk. Anni chhungkua mi zahawm tak Nepali hnam tha sipai pawl nisa helaia Lapan a lo phunte hi army tana a remruat a ni e tih loh rual a ni lo. A henah lawmthu awm se.