MO KAN NEI TA

Thian duh takte u,

Mo kan nei ve ta. Thu leh hla lama kan thiampuipa Dr. James Dokhuma tunu, Baby Zothansiami d/o C. Nikhama, Kulikawn chu vawiin 10.7.2009 hian kan inah a lo lawi ta. Kum 25 chhunga Pathianin fanu thar duhawm tak min pekna hmasa a ni a, kan va lawm tak em! Bible-ah khan duli tibotuin a hmuh leh avanga a lawmna chungchang thu kha kan hmu a, duli bo hmu leh mah khati fakauva a lawm chuan, kum 25 chhunga fanu thar han nei hlawl maitu lawmna chu a sang viau vang le!! Kan monu hi Chhakchhuang nu leh pa kara piang a ni.

Mizorama biak in ding rei ber tawh, Central Corps biak in, Kulikawnah Major Siamluaian chawhnu dar 2 khan a inkutsuihtir a, ani pawh re-employed a nih atanga ceremony a khawih lehna hmasa ber a ni bawk. Rin aiin inneih inkhawmah mi an lo kal tha a, biak in pawh kan khat tlat a ni.

Thunawi thenkhat han zep lawk ila. Pi Niangi chuan "Sepa, i hmu tha e, he tiang hi kan duh ve, min lo zawnsak ve rawh" a ti a. U Thartea chuan, "Sepa, thianah min hmang la" tiin a rawn dil sek bawk. Pu Hrangngura pawhin zan khat chu an lo len lai takin kan monu turte chu an lo kal a, "A tihtham khawp mai" tiin a lo comment bawk. Nupui man tumtute 1) A pi, 2) Major Shamu Meitei 3) Major Lianhlira. Kan thawhpui dangte pawhin pawisa fai bakah Disposable plate & cup, buhfai, motor etc bakah Major Hrangnguran innei turte leh an thiante chei turin a fanu Achawii a thawh bawk a, anin man lovin engkim a ti bawk.

Booth Conference Hall-ah chawhnu dar 4 khan mo lawmna hun tawi te hman a ni a, Major Lalnunthara (Babies' Home i/c) in a kaihruai a, Dar 4:30 atangin mo lawmna ruai kilho a ni a, mi 226-in an ei a, kan lawm hle a ni.

Innei tharte nu leh pate ve ve a nih hi.

Booth Conference Hall-ah Major Lalnunthara chu MC zei takah a tang.






















posted by Major Vanlalfela

DARJEELING DISTRICT RELIEF

Thiante u, In lo hre tawh chawk ang a, hmanni deuh hleka West Bengal-a Cyclone tleh lai khan Darjeeling leh a chhehvelah lemin a nasa hle a. Mihring nunna leh In leh lovin a tuar hle a ni. Darjeelinga Commanding Officer tharte In leh a hnuaia Goirls Hostel pawh a chhe nasa hle a. Vanneihthlak takin nunna em an in hloh lo hlauh. Hotuten London lamah rawn report na chang an hre hlauh a, Rapid Response atan US$ 5000 pek nghal an ni a. Captain Vanlaltluanga leh khilaia vela thawktu dangten Relief team siamin Aizawl THQ atangin Major Lianhlira Social Secretary in a zuk pui bawk a. Tanpuina pawh Buhfai KG 50 theuh leh thil dang chi sarih lai tuartu chhungtinte hnenah an sem thei a. Hei vawiina an thlalak rawn thawnte ka rawn pho lang nghal e.

JOB SATISFACTION

Hraileng leh Nuthai te chhamang zala thlamuang taka tawnmang rama an chen tawh hnu in, ngaiteh kei lungmawlte hian suangtuahna ril zam vel khawvel chu zu luh chilhin zan mu chhin mai zai relloin mahriakten tukhuma kut suiha laikhuma zal chungin siamtu leh a siamate chung chang te,ka hringnun zinkawng chhuk chho ka lo zawh ve tawh dante tu dang ngailo a dawnin tlai khua kalo var ve teh reng a nih chu.

Kan naupan laia kan value system leh tunlai naupangte value system in thlak danglam nasat zia te ka ngaihtuah thin.Keini chuan kut lehlama kurtai emaw chawtlang emaw keng chungin kut leh lamin Sephung kan humkhawm tun a,mihring ek atanga kan laihchhuah phei chu a huai duh bik avangin kan roh bik thin kha ani a. Kaihbu,suktlawng thing emaw herhse thing atanga suih ngat phei chu han 'intawk' nikhua pawh khan kan ding chang deuh thin kha chu a nia.Marble te kha 'Sithret lung' kan ti ngat mai a,tawlailir 'Rel lem' te kha kan hlimna pui berte zing ami chu a ni thin.

Tui-um khirh ngatin tui kan chawi thin a,kan thawnthu ngaihthlak,ngaihnawm kan tih em em te kha Chhura & Nahaiachanchinte,Chemtatrawta,Nuchhimi,Mualzavata,Tlumtea,Rairahtea leh Palo-a te,Liandovate unau tih velte khan kan lairil nun khawharna leh tuihalna kha min chhawk zangkhai hle thin.Tunlaiah erawh heng thilte ai chuan,Pokemante,Power rangerte, Popeye te Tom & Jerry te chu kan fate hriat leh hmuh duh zawng a ni a,Sephungte,kaihbu tih vel chu an hre ta mang hleklo mai.

Thalfavang kawl eng ruih maite,fur khawthiang vuk maite,sikni eng leh daifimte,tlangsam parte;tuahpui leh vau lo vul leh thinte,thalfavang zanthiang chhawrthla eng paw vo maite leh thal romei zam paw chek thinten kan nunah khawtlang lunglen leh zunphurh na min thlen thinte chu tunah zawng a 'relevant' ta hauhlo mai le.E mail hmanga in 'chat' zung zungte,Mobile phone hmanga in 'sms' leh han inbiak pawh maite chu an 'zunphurh thingtinpar leh an khawtlang lunglenna' a lo ni ta! Lehkhathawna kan saptawng thiam zawng zawng telh a a thlum thei ang bera khua hmun leh hmunlo amite 'puar ak' tira ngam leh ngamloa kan va 'approach' ang kha ani tawh lo,TV hmachhawna mipuite hriat vek turin an in 'chhas' thu leh an 'in ban' leh thute chu zak map lovin naupangte te te chuan an puang ta peng peng mai anih hi ! In thlau veng veng tak a ni.

Luite kama Thangthleng kama hlimna vawrtawp nei ve mai thin a in ngaite zingah khan ka tel ve ngawt mai.Tun ang hian kei tehlul hi Pathian rawngbawltu ka ni ang tih reng ka ngaihtuah ngailo.Kanu leh pa ten min tawngtai sak thinnate kha hetiang zawng hian Pathianin a chhang ang tih rin ngaihna reng pawh ka hre lo.Mahse Lalpa,lei leh vante,khawvela leh a chhunga awm zawng zawngte siamtu chuan a rawngbawl turin min lo ko ve mial tlat mai.Ropuina leh thiamna,hmingthatna leh ropuina chhuan tur reng neilo pawh min lo ko duh ve hi mak ka ti thin a,salvation officer,ka ngaihsan em em thinte zinga ka lo tel ve ta mai hi 'mak' tih em em chang ka la ngah mai.

Hei tak hi a ni sawi ka tum chu,'mahni duh zawng tak thawh a lungawina' hi.Mihringte hian a tira kan duh tak pawh hi thawk ila,a hnu ah duhamna avang emaw chapona avang emawin kan duh taka kan hnathawwhna ah khan lungawiloin phunchiarna kan zawng fo thin.Sipai Pawl Officer hna hi ka phuloh leh ka phak loh hna chu a ni a,mahse ka pianthar hnua Lalpa min kohna ka hriat atanga ka hnathawh chak ber ani a,chu mi thawk theia Lalpan min siam ve ta mai hi vannei ka inti ngawih ngawih thin, ka thawh hlawk chiamlo hle tih chu hre mah ila.Ka nih phakloh,ka ei phak loh,ka thutna phak loh,ka chuana phak loh,a tum pawh ka tum phak loh ah Lalpa hian min hruai hi mak ka ti a,chu tak chu a ni,Lalpa rawngbawl hi ka job satisfaction chu a lo ni ngei mai le.

A thui lutuk dawn,duhtawk phawt ila,part 2 na kan la chhunzawm leh dawn nia

Posted by : Capt.Lalramliana Hnamte

CHELSEA FLOWER SHOW

Thiante u, Tunlai hi Chelsea Flower show awm lai a ni a. Ka thiannu Mamuani (Mrs Rev. Lawmsanga) Birmingham a mi nen kan va en ve a. A hmuhnawm kher mai. In hlimpui ve ka rin avangin hei Army Home-ah ka rawn pho chhuak a. In lo enjoy ve ngei ka ring e. Pangpar mawi tak takte hian nun an tihlim a, Siamtu siam ang angin mawi takin an vul a. An siamtu pawh hian an hlimpui ka ring thin. Bible chuan 'Solomona meuh pawh a ropuina zawng zawng nena a inthuam pawhin heng tuktinpar pakhat tluk pawh hian cheiin a awm lo' a tih kha a dik hlein ka hria. Kan Mizo hla siamtu pawhin zoram mawi a tihna chhanber pakhat chu Parmawi thang vulna ram a ni hi a ni a. Phunchawng, Nauban, Ainawn par, Tuah, Vau, Chhawkhlei Senhri par, Chawnpui par, Samtlang, Dingdi Parmawi thang vulna zoram hmun zauvah a lo ti a nih kha.
An hming chu nia in hriat hriat lo vuah ve tawh mai teh

Lalhlimpuii

HIAMALAYA DIVISION

Himalaya tlang hi chu naupang te kan nih lai atangin kan hre tawh hlawm a. A tlang sang lai ber pawh Mt. Everest a ni tih pawh kan chiang hlawm hle. Himalaya tlang hi slow motion continental drift-in a siam niin leilung zir mite chuan an sawi a, hriat tham lohvin a la san belh zel ni pawhin an sawi nghe nghe; a chhan chu continental drif hi a la reh chuan loh avangin.

He tlang pangper leh a bulthut velah hian ram hrang hrang a awm a, a ram a hausa a, mihring cheng pawh an tam hle. Tlang sanga vur tuite chuan tuihna tha tak siamin, Brahmaputra leh Ganges luite chu afur athalin kuang khat putin an luang dul dul reng mai a ni.

Himalaya tlang hming chu naupang te kan nih lai atangin lo hre tawh thin mah ila, Salvation Army nen chuan kan hre dun ngai lo va, kan ngaihtuahnaah pawh a awm ngai hek lo. He tlang panga hmun thenkhat - Darjeeling khuaah chuan Deaf & Dumb School kan nei a, Kalimpong-ah Mary Scott Home for the Blind neiin, Namchi (Sikkim)-ah Corps nei mah ila, 'Himalaya' tih hi Chhandamna Sipai Pawlten hming kan phuah chi hrang hrang zingah hian a lo tel ve kan ring phak ngai lo. Mahse, a tel ta tlat mai le!

Nepal rama thingtlang naupangte

Arunachal Pradesh naupang

Tunah chuan he tlang pangper leh a bulthut ramahte rawngbawlna kalpui mek a ni ta hlawm a. Arunachal Pradesh-ah Corps leh centre engngemaw zat kan nei a, Meghalaya-ah Corps hnih a awm a, West Bengal state chhung Fatapukur, Kalimpong leh Darjeeling-ahte kan nei bawk a. Nepal ramah leh Assam ramah pawh rawngbawlna tan a ni ta bawk.

1st April, 2009 atang khan Himalaya Division hawn a ni ta a, Divisional Headquarters chu Guwahati-ah bun niin, chumi hmunah chuan Divisional Commander hmasa ber Major ST Dula leh Divisional Director of Women's Ministries hmasa ber Major C. Malsawmite chu dah an ni ta a. Ni 24.5.2009 khan Colonel Samuel Charan, Territorial Commander-in a dah nghet ta a ni.

He installation service hmang tur hian Shillong Corps leh Madanriting Corps chuan bus pakhat ve ve hmangin an lo kal a. Major Lalthlamuani, Guwahati Centre-a kum nga lai lo thawk tawh leh chinchang lo hre tawh takin inkhawm akaihruai a, Sipai Pawl thian tha, kohhran dang mi tam tak an lo kal a, Baptist kohhran pastor, Regional Director hna chelh mektu pawhin he installation service-ah hian a rawn tel ve. Inkhawm banah inkhawm zawng zawngten tlai takin ruai an theh. Madanriting Corps (Shillong) in zaipawl mawi tak, an Kros Sipai Pu Lalrinpuia (visual handicap) hovin an nei a, ngaithlatute rilru a khawih hle.

Major Lalthlamuani inkhawm hruai leh ruai thehho

2009 May thla thleng hian Himalaya Division chhunga rawngbawltu awmte chu:-
1. Majors ST Dula DC & C. Malsawmi DDWM
2. Major Lalthlamuani i/c Guwahati free food feeding prog.
3. Majors Lalbiaktluanga & Aichhungi, Mary Scott Home for the Blind, Kalimpong
4. Captains Vanlaltluanga & Rebek Rohnuni, Deaf & dumb School, Darjeeling
5. Captains L. Joythang & Lalthanliani, Namchi Corps, Sikkim
6. Majors R. Thankhuma & Romawii, Shillong CO Bial
7. Lieutenants Sharon Rai & Pratna Rai, Darjeeling Corps
8. Lieutenants Isak Lalremruatkima & Margaret Lalrinawmi, Manja Corps, Karbi Anglong, Assam
9. Kros Sipai Lalrinpuia
10. Majors PC Lianthanga & Vanlalchhuangi, Pasighat, Arunachal Pradesh

'Laligurash' - National flower of Nepal (Keinin Chhawkhlei kan tih hi a nih hmel)

'Orchid' - state flower of Sikkim

'Foxtail' - state flower of Arunachal Pradesh

'Kapou phul' state flower of Assam

posted by fela

Dorcas Seminar

Ni 17-19 April '09 chhung khan Dorcas Seminar kan nei a, South Africa Territory atangin Lt.Col. 3, Malabi, Thalita leh Langa-te an lokal a, kei pawhin ka chhim ve ngei, ka hlawkpui khawp mai. Seminar han tih lemah Hmeichhiate tan bik, eisiam leh thil thui lam zirna a ni ber. Thlalak thenkhat ka rawn vawmbei mai mai e...

Army Flag pawh kan thui

Fish Figgadel

Group photo

TableclothSoapstand

PI LALCHHUANGI HRIATRENGNA

Army nu, ngilnei leh zaidam, tanpui ngaite tanpuina kawnga chhuanlam siam ve ngai lo, a kut renchhamte thleng phaka phar thin hriatrengna lung chu phun a ni ta (3.4.2009). Mite ngainat hlawh, khawngaihna leh ngilneihnaa khat nu, Pi Lalchhuangi w/o Pu Thangchina, Sihfa hi kei takngial pawh hian ka hre reng ang. Officer atan commission kan nih hlimin, an khaw kaltlang ngai Phuaibuang Corps-ah dah kan ni a. Officer junior leh zakzum tak kha headquarters kal dawnin emaw, haw dawnin emaw mi ina riah a, chaw lam a ngai thin a, kea nihnih kal a nih avangin.

A chang chuan Keifang atang te, Saitual atangtein zing takah, khaw la var hmain ka tho va. Mahni bag akin, Phuaibuang ban hman ngei tumin kein ka chhuak thin a. Chuti ang hunah chuan Pi Lalchhuangi hi ka tan malsawmna a ni thin.

"Chaw in chhum apiangin mikhual pahnihkhat tal thlak kep ziah rawh u" tih chu nu leh pate thupek a nih avangin, an ina tukthuan lam chhoh pawh min tingam sawt a. Puar el euha kan ei bakah chhuna ei tur min la funsak ziah lehnghal. AW! Kha In, a neitupain 'Kan Chhungkaw Entu' tia a sawi thin, nu ngilnei tak awmna kha, 5 star hotel ai pawhin ka tan chuan a thlakhlelhawm a, ka thla a muang thin.

Kha In, liang hniam ang reng tak, a neitupa erawh pa sang tak ni si, a bang thumbawh-kaihsawih, a kanga sak kha ka mitthlaah a cham reng thin. A kawtah buhherkhawl a awm a, favai awm hner-hnur te, ar tla noh nohte pawh kha ka la mitthla thiam khawp mai.

Pi Lalchhuangi thlan
Mahni awmna pana kea ka kal chu an inah tukthuan ei hma deuhvin ka lut hlawl a. Chaw ka rawn ei dawn tih bak chu ti-ti khawchang han sawi tur pawh ka la hre em em lo va. Ani erawh chuan ka awmna te min zawt a. Ka chan chanchin te leh rawngbawlna chanchinte min zawtin min be tlangnel zung zung thin. Zahzum nak alaiin ka han tawngtlem zui a, mi lo thlengtute tan kha chuan ka buaithlak ve ngawt thin ta ve ang.

Sihfa khua
Phuaibuang khua hi luipui pahnihin a dan, Tuivai kuala awm a ni a. Saitual lam leh Darlawn lam atangin ka kal ber thin a, 'W' anga kea nihnih kal a ni a. Chawhma chhuk, chawhnu chho a ni ber e. Mahse, chak vanglai deuh a ni bawk a, nikhat kalah ka hmang thin. Amah ka hriatna leh kan Phuaibuang awm hi a inzawm tlat avangin, Phuaibuang khaw kalkawng nen ka han ziahpawlh mai a ni e.

Lungphun ni hian Pi Lalchhuangi chanchin ziahna 'Kan Chhungkaw Entu' tih lehkhabu tihchhuah a ni bawk. Pi Lalchhuangi hi Commissioner Lalhlimpuii nu a ni e.

Hriatrengna Lungphun ruai an buatsaih chu mi tam takin kan ei a, puar leh tlai takin kan ei hlawm.


photo & posted by fela