Thursday, January 8, 2009

MO LEH MO NEITU



Mo leh Mo neitu tiin kan sawi thin a. Mahse, Mizo tawng kalhmang ngun taka ngaihtuah chuan Mo neitu nia kan puh tak ber hi a dik chiah lo niin a lang. Mo neitu chu nupui neitu kha ni lovin, nupui neia nu leh pate kha an ni si a. Ceremony buah leh hlaahte pawh Mo leh Mo neitu tia sawi an ni nachungin, a dik hlel deuh a ni.

Mo tih hi chu a dik a. Mahse, Bible tawng atang chuan MO hi hmeichhia an ni kher lo. Krista Mote kan ni, kan tihah hian MO hi neuture gender a nih a rinawm.

Engtin nge Mizo tawngin nupui neitu chu kan sawi tak ang. Mopa tiin sawi ta ila, a dik tawk lo ti tam tak an awm awm bawk si. Mahse, monu tia kan sawi pawh hian Mizo tawng kalhmangah chuan pasal neitu kan sawina a ni a, pasal neitu nu tihna a ni lo. Bawihnu, bawihpa tih pawh kan Bible-ah a tam hi. Chuvangin a awlsam zawngin, monu, mopa tia sawi mai hi a tha viau a ni.

A mo neitu ber thianpa Zamlova ai mahin ka lo hmanhmawh a, ka rawn tarlang ta mai a ni e. Tunlai hian mipa tam zawk chuan an nupuia nu leh pate hi 'ka nu, ka pa' tiin an ko va. Tam tak chuan Mizo dan pangngai ang a 'ka pi, ka pu' tia ko an la awm bawk. Hei pawh hi 'nu, pa' tih ai ngawt chuan 'pi, pu' tih hi a hlu zawkin a sang sawkin a lang. Mizo danah chuan nu leh pa, u leh naute chu tuithlar theih an nih laiin pu erawh chu tuithlar thiang a ni lo va, theih pawh a ni lo a ni. Heta pu tih hi puzawn chu a ni kher lo mah se, pu nihna hi chu nihna sang tak a ni.

Mo nei tam zawk hian 'mo pawh kan ti phal lo, fanu kan ti zawk a ni' an ti fo. Hetah pawh hian fanuhlutna a awm a, famo hlutna a awm bawk. Famo hi fanu aiin a hlu lo chuang lo va, dik tak chuan a hlu zawk mah a, neitu chan a chan zawk mah asin. A chhan chu phunthawh (hnam, chi leh kuang bo) meuhvin a pasala in leh lovah a rawn lut a ni. Fanute erawh chuan engtikah emaw pasal neiin mi inah, mi chi leh kuang hringtu (hringtu tih ai chuan paitu tih a dik zaw mah mai thei) an va ni ve leh mai dawn si a.

Hmeichhiain pasal a neih hnu thleng pawha a hnam hming a la chhawm reng pawh hi a dik chiah lo niin a lang. Ralte-in Sailo hnam pasal a neih chuan Ralte a hring lo va, a dazat (anglo) a hring lo va, Sailo dik tak a hring a ni. Pasal a neih hnuah chuan a hnam hmasa kha bovin, a pasala hnam zawm ta se a dik zaw phianin a rinawm. Hetianga ti hi Mizo hmeichhe zingah pawh an awm. Hei vang hian a nia chhim lamah pawh hmeichhe man a to nachhan chu. Hei hi Pu man emaw Phunthawh emaw emaw an ti a. Hmeichhe pu khan a chi leh hnam bo tur manah khan a duh zat zat a phut thin a ni. Cheng zahnih ni sela, cheng zahnih aiah silai ka la ang a tih chuan a inhen tawk tihna a ni mai. Cheng zahnih aiah bel khap thum ka la ang pawh ti se, a inhen tawk a ni leh mai. Phunthawh manah hian engmah bituk leh inphu tawk duansa awm ngai lo.

posted by fela




4 comments:

  1. Pu Editortupa chu leh... i ti tha kher mai, inneih chanchin i ziak dawn emaw tih laia Mo leh a kaihhnawih lam i ziak daih erawh hi chu min bum deuh chu a ni. Mahse a tha ka ti tho e.

    (Fanute erawh chuan engtikah emaw pasal neiin mi inah, mi chi leh kuang hringtu (hringtu tih ai chuan paitu tih a dik zaw mah mai thei) an va ni ve leh mai dawn si a.)

    Khilai para khi ka chhiar a, ka rilru-a lo lut chu NUKAWKI FANU tih lehkhabu Lalhmingliana Saiawi ziah kha a ni. Khatah pawh khan Nukawki Fanu ti-a a rawn vuah chhan zawk tak chu a Famo (A fapa Ropianga nupui) kha a ni tlat. In rilru a inang awm hlein ka hria, dikna chen pawh a awm ka ti ve a, ka rawn thlawp che a nih chu.

    ReplyDelete
  2. Thianpa Fela a ti tha e, keini lamin engmah kan la dah thei rih lova, hei Kolkataatangin kan thiante broadband hmangin ka lut zuai a, comment pawh ka dah thui hman lo. Fanu pathum neih beisei, a hmahruai hmu ta kan ni a, kan lawm. Pathian malsawmna a ropuia, thiante min hmangaihna leh duhsakna a sang a, anmahni avangin tum aia tha leh ropui daihin engkim a thleng!!Kan Pathian hi "Maka=WONDERFUL" a ni chiang e...Kenya.... London.... etc etc atangin tanpuina kan dawn te, Pu F Kapsanga te chhung vawk thawh leh Pu Vanrohlua (L) hminga buhfai bag 2 kan dawn te, Major Hminga (brand new Major) te chhungkua, Pu CL Para (Delta sound), U Nghaka Temple CS te chhungkua leh midang tam tak te khawngaih thilpek avanga heng hi puitlin thei kan ni. Kan thiante mahni zawnah an tangkai em em vek kan sawi seng lo. Kan lawm a ni ringawt mai.

    ReplyDelete
  3. Josepha pa ti tha hle mai. Kate-i pa leh Joseph-a pa chuan Timothy-a pa chu tu neih hmasak ah chuan an tluk dawn lo deuh chu a ni maw ! Tan la turin an fate fuih ve se a tha ang, chutilo chu tu mawng an beng har bik awm em mai

    ReplyDelete
  4. Keini session hi mak ve riauna kan nei a:
    1. Pian kum thum hmun (mipa zawng)
    2. Inneih kum thuhmun
    3. A tirah chuan zirsan dan inang tlang
    4. Nupuite thiam san dan poh thuhmun
    5. Sa duhzawng in ang (thin)

    Kan thiante 2 hi Lalpan a hman dan hi ropui ka ti. Pakhatin thu-a rawngbawlin Zoram deng chhuakin Thutakin a chawm a- adangin ziakin Zoram chauh ni lo rampawn thlengin Zofate tana rotling tur thuziak tha a chhawp chhuak reng bawk. Magazine pali hneh taka enkawl hi a hautak dan tur ka chhut thiam pha lo ve!

    ReplyDelete