Thursday, August 20, 2009

LUNGLEN HNEMAH AW!!

SALVATION ARMY Missionary Mizorama awm hnuhnung ber James Kenedy (chutih laia Major) khan "Mizo hi Lungleng hnam in ni, ruah sur leh lungleng, khaw that leh lungleng..." a ti thin e an ti a. A dik khawp mai. Khawtlang lunglen te pawh kan nei a ni. Ngaih bik hre si lova, engkim maiin lung a tihlen em em hian 'Khawtlang Lunglen' an ti a. Upa chuan mi, chutianga an awm chuan an thih a hnai a ni an ti thin. Kan tleirawl laiin kan rual ute zinga mi pakhat chutiang chuan a awm a, a tap a tap mai thin a, mahse a thi lo, vawiin thlengin a la dam.
Zoram pawnah Lalpa rawngbawlna avangin kan han pil vang vang hlawm chu a ni a, lung chu a leng duh viau a ni ang, tap deuh karh karh te pawh kan awm em ni kha!! kan ram lam thlate hi Major Fela tih dan deuhvin han tar chhuak ila lunglente pawh a lo hnem takin tiila a tizual zawk
anf tih pawh ka hlau hlel love!!!!
Aizawl tlak lama awm in nuala, hengte hi hmuhnawm a lo nih takin, a hmun hmate mi ram angin cham derh durh lo mahse zofate lung chu a tileng ve chiang alawm.
Turnipui mah nise tlai lamah Reiek tlang a liam dawn meuh chuan chhun lamah a satna a hmang da zo tawh ngei a nem duai mai thin a nih kha ti rawh u. an liam ruai ruai mai chuan Aizawl tlak lam fate lung chu a tileng thin a ni.
Ni tlak sarah Motherless Baby Home Solar, THQ Staff building chunga mi chu a eng kulh mai a, Bethel runpui lai vela Temple chungah Eng an hmu an tih kha ni mai hmel te pawh a pu. Mahse a ni lovang, hei hi chu tlai ni tlak sar a mi a ni e.
Sihfa khua hi Sihfa tlang pang, khaw chhak lam hawia awm a ni a, a ralah tlang lian tak pakhat a awm avangin khaw chhak lam a lang zau lo hle. Hei hi Commissioner lalhlimpuiin a naupan tet atanga a thlir thin Sihfa atanga khaw chhak lam thlira a lan dan a ni. Tlang dung lang hla zawk hi Bualpui tlang dung a ni a, a hnai zawk chunga var khamphei deuh raih hi Changzawl khua a ni.
A chunga mi hi Chhawrtui khua, Salvation Army Biak In awm thinna Bung tlang atanga khaw chhak lam thlira a lan dan a ni a. Ka naupan tet atanga ka mitin a thlir fo thin a nih avangin ka lung a tileng hle thin a ni. Veng hmawra Biak In lang hi Army Biak in a ni a. A thlang zela ruam lang khu Tuichang phai a ni a. Vei lam pang tlang kawna khaw lang khi Arro a ni a; Dinglam pang deuhva tlang a chhipa te taktea phir deuh mum deuh pul hi Zuchhiop tlang a ni a, Major Rama pianna khua a ni nghe nghe em kha?
Nikum hmasa khan Guwahati atangin Motorin kan haw chho va. Thingdawl kan tlan pelh laiin Ni a tla fel a. Kan tlan chho zel a, khua a thim ta chhelh chhawlh tih chuan khaw chhak lam atangin fiah em em mai hian Zan lam lalnu, Chhawrthlapui a lo chhuak tut tut a. Motor atanga chhukin kan nghak chhuak ta a, lung a tileng teh asin, ka naupan laia thiante nen kan pawnto hla sak thin - Khuang bulpui, khuang bulpui, A nuam zawng zawng; Zawnga zawnga sa zawng kal dim a meibul ka selah. Lailungte hnenah kang kang buhkan te lawng te lawng e. Fapa duh lai duh lai e, a khi tlangah khian Ainawn tlangah khian Sazuk sial an chhun, ui tangin ar a lak, Neih khawdai a hel. Khawi dangin vi vi a ti, khawi dang hnuaiah puan kan khawngah khawngah, Kaikuang kuang ringsai, Muala pipu pu lerah neihchang sawmi saiah, Pa rawng saithangzai maw, nu rawng saithang zai maw, a pa lu chungah thanzama, a nu lu chungah thanzama, Sa ti mei zing chhem chu deiin duai ah. Hren kaih hren kaih tih lai a, pi sa, pu sa dawng rala, kel sa tih bang a, tuibur rawn hawn bak sang e. Pem ler in khawr inkhawrah, pemler in khawr inkhawr e, muala su dim su dim e, kelte nau awi nau awi e. Pi pu loh lama ral lu ka khai zawnga mei duaiah, zawng chala mei duai ah. Darin thing a phurh, hmawngpui hnuaia thing a phurh, tuite in khuap na riai riau. Ka chhakah, ka chhakah ka zin hlanin ka uiin thleng kuang a luh e, bel a luh a. Lui dunga su keng keng, lui dung su keng thang vapual mei aw lam lam. Lal mualah kel chal rawn kai e, ni awk e, sa awk e, inpui tualah, inpui tualah huanah Tumbu kawrin tangka ban a bun, Lersia te huiah, Pazawna te huiah, Dar khing khai dar khing khai, Chheiraw bak sangi va mak tak em ve aw, lung kaikuang, Lungpui su dim kan hel e, Chungu luak pak chheih khawh!! tih hlate hi min hriat chhuahtir nia. A awmzia min zawt suh u, ka hre bik lo.
He Kuhva huan hi i hmu tawh ngai em? Cachar District a, Salvation Army Corps pakhat Kahrod Corps compound a nih hi. Army nen in hmeh lo i ti deuh mai thei e!! mahse Sumchang thlai awm chhun a ni tlat. Heng intodelhna tura theihtawp chhuaha tan la Officerte hi an fakawm ka ti thin. Mahni hmun hma theuhvah Army property tipuitling turin tan i la theuh teh ang u.
He tlang chhumin a bawm chak mai hi Chalfilh tlang Aizawl lam atanga thlira a lan dan a nih hi. Kan ram tlangte hian zofate mit a la a, an lung a tileng emaw an lunglen a hnem emaw tal a ni thin. Hengte hian i lunglen khawhar a hnem ngei ka beisei e.

4 comments:

  1. Thlalakte chuan lung an ti leng hlemai,nitla tur hian ka lung a ti lengfo thin, mahse, nitla lai hmulo hian kalo awm rei ta hle mai,zoram ti ngaihawmtu pakhat niin ka hria. Mizoram ah thingtlang zokhua tih tur nge ka hrelo ah hian ka naupang lai hun ka hmang tamin ramvah te hi nuam ka ti thin. Chhawrtui khua hi lakal ve ka chak khawp mai,Kahrod pawhin ngaihtuahna ati thui hle mai...

    ReplyDelete
  2. Pawnto hla chu i va hre thuiin i va hre rei em em...

    Picture 3 chu nalh khawp mai

    ReplyDelete
  3. Tun tum chu Kahrod Corps compound-a kuhva hmun kher khi ka comment teh ang. A inhmeh lo tak a nih khi mawle. Kuhva leh ruihhlo dang laka insum tura mite zirtirtu berin kuhva kan hralh hem hem dawn a nih hmel si a. Mite hneh a har ngawt ang. Tuna kung dinglai khi a rem hunah (a dang phun belh lo se), huan thlai chi danga thlak ka rawt e. Kan hotuten a thlakna tur tha chu an hria ang.

    ReplyDelete
  4. Training a kan thawh laiin Cachar bial Ten days campaignin kan fang a. Kahrod pana kan kal kawng chhovah pawnto hla hi tuna ziak ang diak diak hian (niin ka hria) zu sa chhuak vek thei a mawle!!! Pu ber hriatna hi tha khawp mai.

    ReplyDelete